Dili.spektrumnasional.com || Sua Eselénsia Ministra Solidariedade Sosiál no Inkluzaun em Substituisaun, atuál Vise-Ministra Solidariedade Sosiál no Inkluzaun, Céu Brites, hala’o abertura ofisiál ba treinamentu enumerador sira ba Programa Saúde Nutrisaun Inan no Oan (SANUTRIO), iha Postu Administrativu Gleno, Munisípiu Ermera, Kinta-feira (23/04/2026).

Iha diskursu abertura, Vise-Ministra hatete, programa SANUTRIO iha objetivu atu hadi’a nutrisaun inan ho oan to'o idade tinan 3, hodi prevene malnutrisaun no promove saúde di’ak ba komunidade sira iha Timor-Leste.

Enumerador sira mak liña oin iha prosesu rekolla dadus. Se dadus laloos, polítika no intervensaun sira mós bele la efetivu, tenik Vise-Ministra MSSI

“Programa SANUTRIO sei sai hanesan projetu pilotu iha Munisípiu Ermera, Covalima no RAEOA, tanba tuir dadus estatístika tinan 2022 hatudu katak nivel malnutrisaun aas liu iha área sira ne’e. Maibé, se implementasaun programa ne’e hatudu rezultadu pozitivu, sei entende implementasaun ba Munisípiu sira seluk iha futuru”, katak Vise-Ministra.

Entretantu Prezidente INETL, Elias dos Santos Ferreira hatete, treinamentu ida-ne’e nu’udar fatór xave ba susesu iha implementasaun programa SANUTRIO. Tanba ne’e, husu ba Enumeradór sira atu mantein disiplina no partisipa ho sosiedade iha treinamentu ida-ne’e.

Treinamentu refere lansa simultañamente iha Munisípiu Ermera, Covalima inklui RAEOA. durasaun formasaun sei hala’o durante loron hitu, hahú husi 23-30/04/2026. (**red/Mídia MSSI