Dili,spektrumnasional.com— Ajénsia Promosaun Investimentu no Esportasaun, I.P. (TradeInvest Timor-Leste), liuhosi Diresaun Promosaun Esportasaun (DPE), organiza Workshop kona-bá Asesu Merkadu Xina ho tema “Komprende Rekizitu Importasaun Xina no Rejistu GACC ba Esportadór Timor-Leste”, iha Maubara Room, Timor Plaza, Dili.

Objetivu prinsipál hosi atividade ne’e mak atu hasa’e koñesimentu no kapasidade ba emprezáriu sira, esportadór, importadór no parte interesada sira kona-bá oportunidade asesu iha merkadu Xina. Nune’e liuhosi workshop refere, oradór sira partilla informasaun kona-ba regulamentu importasaun Xina, prosesu rejistu General Administration of Customs of China (GACC) no prosedimentu sira ne’ebé presiza atu la’o tuir hodi bele esporta produtu ba merkadu xina.

Iha oportunidade ne’e, oradór sira mós fahe informasaun kona-bá oportunidade importasaun ekipamentu hosi Xina, nune’e mós esplika servisu logístika no transporte marítimu entre Timor-Leste no Xina, ne’ebé bele fasilita movimentu merkadória no kontribui ba redusaun kustu komérsiu entre nasaun rua ne’e.

Atividade ne’e loke ofisialmente hosi Adjuntu Diretór Ezekutivu TradeInvest Timor-Leste, Sr. Roberto Lai, iha nia intervensaun, hateten katak workshop ida-ne’e nu’udar oportunidade importante atu partilla informasaun relevantes ba esportadór no futuru esportadór TimorOan sira kona-bá prosesu esportasaun ba merkadu Xina. Tanba tuir nia katak, komprensaun kona-bá rekizitu importasaun no prosedimentu rejistu GACC ne’e sei ajuda emprezáriu sira atu prepara an di’ak liu hodi bele asesu ba merkadu Xina.

Sr. Roberto Lai mós afirma tan katak, demonstrasaun no aprezentasaun sira iha workshop ne’e sei kontribui atu aumenta koñesimentu prátiku kona-bá prosesu esportasaun, hodi loke oportunidade ba produtu Timor-Leste atu tama ba merkadu internasionál no liga negosiante TimorOan sira ho merkadu globál.

Maske TradeInvest Timor-Leste nu’udar ajénsia ida ho rekursu limitadu, nia reafirma katak instituisaun ne’e sei kontinua hatudu komitmentu no vontade forte atu buka oportunidade no solusaun ba setór privadu, hodi fasilita asesu ba informasaun, merkadu no parseiru internasionál sira.

Atividade ne’e hola parte hosi reprezentante instituisaun governamentál, parseiru dezenvolvimentu no emprezáriu esportadór potensiál sira hosi setór oioin, ne’ebé hatudu interese bo’ot atu hametin sira-nia kapasidade no aproveita oportunidade komérsiu entre Timor-Leste no Xina. (**red/ TradeInvest Timor-Leste