Dili. spektrum-nasional.com || Prezidente Federasaun Futebol Timor-Leste (FFTL), Sr. Nilton Telmo Gusmão dos Santos partisipa reuniaun kona-ba implementasaun jogu Liga Timorense epoka 2026, ne’ebe lidera direta husi Ministru Juventude Desportu Arte no Kultura (MJDAK), S.E. Sr. Nelyo Isaac Sarmento, iha salaun enkontru gabinete MJDAK. (24/02/2026)
Sorumutuk ne’e, halo diskusaun kona-ba oinsá atu implementa Liga Timorense iha époka 2026, ne’ebé tuir planu kalendáriu sei hala'o abertura iha loron 22 Maiu tinan 2026.
Husi diskusaun ne’e, parte Órgaun Liga Futebol Timor-Leste (LFTL) ho MJDAK asina ona dokumentu transferénsia apoiu finanseira, ne’ebe governu liuhusi MJDAK fó apoia ho montante USD 500,000 ba implementasaun Liga Timorense époka 2026.
Prezidente FFTL, Sr. Nilton T. Gusmão dos Santos afirma, Liga Timorense importante tenki hala’o iha ita nia rain, tanba ne’e mak ohin mai partisipa enkontru ne’ebé hetan konvite husi MJDAK hodi halo diskusaun ba realizasaun kompetisaun Liga Timorense.
Tanba ne’e, em nome FFTL hakarak hato’o agradese ba governu liuhusi Ministériu Juventude Desportu Arte no Kultura ne’ebe fó ona apoiu finanseiru USD 500,000 ba Órgaun Liga Futebol Timor-Leste atu implementa liga iha ita nia rain.
Ba Liga Timorense époka 2026, FFTL sei la fó apoiu finanseiru diretu, maibé nafatin apoiu tékniku no halo esforsu másimu iha kolaborasaun hodi garante jogu sira atu la’o ho di’ak no susesu.
Atividade futebol tenki la’o, tanba sosiedade hadomi futebol barak mak hakarak atividade futebol nafatin la’o hodi anima sira.
Parte seluk, kuandu Liga ne'e la’o ho di'ak bele ajuda mós atleta ka futebolista sira hodi hasa’e performance iha kampo atu iha tempu ruma bele reforsa selesaun nacional.
Nune'e, Federasaun Futebol Timor-Leste hakarak husu mós ba Orgaun Liga Timor-Leste atu organiza didi’ak jogu ho responsablidade ba apoiu ne’ebe governu fó ona atu sosiedade hadomi futebol sira bele senti satisfas.
Alende ne’e, Prezidente LFTL, Sr. Ipolito Soares mós subliña, diskusaun sira kona-ba jogu iha Liga Timorense akontese ona ohin, no konkorda hodi asina ona dokumentu ofisiál ida.
Nia mós informa, governu liuhosi MJDAK, fó ona apoiu finanseiru hamutuk USD 500,000, tanba ne'e hein katak, iha tempu badak preparasaun tékniku nian bele la'o hodi halo jogu abertura iha loron 22 fulan Maiu 2026.
Reuniaun ne’e, marka prezensa direta husi Ministru Juventude Desportu no Arte no Kultura (MJDAK), S.E. Sr. Nelyo Isaac Sarmento, Prezidente LFTL, Sr. Ipolito Soares ho ninia estrutura, Prezidente Federasaun Futebol Timor-Leste (FFTL), Sr. Nilton T. Gusmão dos Santos akompaña husi Adjuntu Sekretáriu Jerál FFTL, Sr. Fernando Baptista Xavier, Diretór Dezenvolvimentu Futebol no Selesaun Nacional FFTL, Sr. João Maneco Soares Amaral. (**red/FB-FFTL
